As casas
O lugar de Val intégrano dezaoito casas segundo se mostra na seguinte fotografía
A Taberna
Aquí está a taberna que durante séculos forneceu de produtos de alimentación, de bebidas e de tabaco toda a veciñanza da parroquia. A Taberna de Val tamén serviu de lugar de solaz onde se reunían até ben entrada a noite xogadores de cartas e amigos do parrafeo arredor de cadanseu neto de viño tinto.
Inocencio (1932-2022), o taberneiro dos últimos oitenta anos, sempre detrás do mostrador, observaba con atención e soportaba amabelmente todos os parroquiáns xa for para despacharlles un quilo de arroz, para servirlles un cuartillo de viño, para escanciarlles a bebida ou para aturar as partidas de tute e as baralladas dos xogadores.
Noutrora, en Val tamén estaba a cartería, isto é, a casa onde chegaba cada tarde laborábel desde Lugo a saca co correo, que, a primeira hora do día seguinte, regresaba para a cidade coas cartas que os veciños enviaban aos seus familiares e amigos esparexidos polo mundo.
