No fondo do val, á beira da estrada LU-710 está A Pena, lugar onde, desde o século XVI até fins do XIX, residiu, na Casa Principal, a familia Santiso Ulloa, perceptora das rendas da maior parte dos labregos que traballaron estas terras.
Núcleo rural
O núcleo rural está composto por dez casas, das que oito se agrupan arredor do Rego da Pena e as dúas restantes sitúanse cara ao sur en dirección a Carballedo. Até mediados do século XX neste lugar existiu a casa de Correa da que tan só se conserva o soar murado.
O muíño de Montenegro
Por aquí decorre o Rego da Pena, que recolle as augas procedentes doutros regos que descenden das serras situadas a ambos lados. Estas augas fertilizaron prados e moveron durante centos de anos as rodas de varios muíños, dos que só se mantén en pé o de Montenegro, encargado de transformar en fariña e farelo o gran de todos os veciños da contorna.
